Sunday, January 16, 2005

எத்தனை காலம்தான்...

'போதும்' என்கிற வார்த்தையே தமிழில் இல்லையோ என்கிற சந்தேகம் வந்துவிட்டது எனக்கு. ஐந்தாயிரம் குடும்பத்தினர் பாதிக்கப்பட்டார்கள் என்பதற்காக ஐம்பதாயிரம் குடும்பங்களுக்கு தேவையான பொருட்கள் வந்து இறங்கியதும் யாருக்கும் தலைகால் புரியவில்லை. உதவி செய்யும் மனப்பான்மை மக்களுக்கு ஜாஸ்தியாகத்தான் இருக்கிறது என்பது ஒப்புக்கொள்ளவேண்டிய விஷயம்தான். அதே நேரத்தில் உதவியை நேரே வந்து செய்பவர்கள் அடுத்த முறை உதவி செய்வதற்கு யோசிக்கத்தான் செய்வார்கள். நடந்து முடிந்த கதையை பற்றி பயனில்லை. எல்லோருக்கும் எல்லாமும் தேவைக்கு அதிகமாகவே கிடைக்கிறது என்பதோடு விஷயத்தை விட்டுவிடலாம்.



இணைய நண்பர்கள் ஏற்பாடு செய்து கொடுத்த 1740 தரைவிரிப்புகளில் 550 விநியோகம் செய்தாகிவிட்டது. எஞ்சியவற்றை அடுத்த வாரம்தான் விநியோகம் செய்தாகவேண்டும். நேரடியாக விநியோகம் செய்வதை அரசுத் தரப்பில் கடுமையாக கண்காணிக்கிறார்கள். அரசாங்க குடோன்களில் கொண்டு போய் தரைவிரிப்பை கொடுப்பதிலும் பயன் இருக்காது. சம்பந்தப்பட்ட கிராமத்து பஞ்சாயத்து தலைவரையோ அல்லது தெரிந்த நண்பர்கள் யாராவது இருந்தால் அவர்களை தொடர்பு கொண்டு அவசியம் இருந்தால் மட்டுமே விநியோகிப்பது என்கிற முடிவுக்கு வந்திருக்கிறேன். போக்குவரத்து செலவும் அதிகமாகிவிட்டது. ஒரு கிலோ மீட்டருக்கு ஏழு ரூபாய் கேட்கிறார்கள்.

பணத்தையும், பொருட்களையும் அள்ளிவிட்டு இலவசம் என்கிற பெயரில் நடக்கும் எம்.ஜி.ஆர்த்தனம் நிறுத்தப்பட்டாகவேண்டும். சன் டிவி, ஜெயா டிவி, தினமலர் போன்று மீடியாவை கைக்குள் வைத்துக்கொண்டு ஒருதலைபட்சமாக செயல்படுவர்களை புறக்கணிக்கவேண்டும். திரும்ப திரும்ப உணர்வு சுரண்டல் வேலையை செய்துவருபவர்களை பார்த்து உணர்ச்சிவசப்படாமல் நாம் முதலில் இருந்தாகவேண்டும்.

இப்போதைக்கு தேவையானது விஷய தானம் தான். முக்கியமாக வெளிநாட்டு வாழ் இந்தியர்கள் அந்தந்த நாடுகளில் சுனாமி போன்ற இயற்கை சீரழிவுகளை சமாளிக்க என்னென்ன உத்திகளையெல்லாம் கையாளுகிறார்கள் என்பதை பற்றி விவாதிப்பதும் அத்தகைய திட்ட வரையறைகளை இந்தியாவுக்கு தெரியப்படுத்துவதும்தான் முக்கியமான வேலை. சுனாமி எச்சரிக்கை மையங்களுக்குதான் இப்போது தேவை வந்திருக்கிறது. இது தவிர வேறு ஏதாவது ஆக்கப்பூர்வமான விஷயங்களை பற்றி பேசுவதும் எழுதுவதும்தான் நல்லது. மற்ற விஷயங்களை சென்னை திரும்பியதும் விபரமாக எழுதுகிறேன்.

- நொந்து போன ராம்கி, மயிலாடுதுறையிலிருந்து....

6 comments:

  1. இங்கே பாருங்க ராம்கி... இந்தியிலே இருக்கிறதனாலே ஒண்ணும் புரியல..ஆனா ஏதோ பாராட்டி எழுதியிருக்காங்கன்னு மட்டும் புரியுது! http://namaste20matsu.blogspot.com/2005/01/blog-post_110485296457629945.html

    ReplyDelete
  2. அவர் என்ன சொல்றார்னா, தமிழ்ல இருக்கு இந்த பிளாக், புரியலை, ஆனா படத்தைப் பார்த்தா சுனாமி என்ன பண்ணிருக்குன்னு தெரியுது... அப்படின்னு சொல்ல ஆரம்பிச்சு, தமிழும் கத்துக்கலாம்னு பாக்கறேன், அதுக்கு Learn Tamil in a Month அப்பிடின்னு ஒரு புத்தகம் வாங்கிருக்கேன், ஆனா படிக்க கஷ்டமாயிருக்கு... முக்கியமா தமிழ் எழுத்துகள் ரொம்பவே கஷ்டமாயிருக்கு, அதனால இன்னமும் ஆரம்பிக்கவேயில்லை... ங்கறாரு.

    ஏதோ இந்த மட்டுக்கும் தமிழ் படிக்கணும்னு ஆசைப்படறாரே, அதுக்கு போடுவோம் "சலாம்".

    ReplyDelete
  3. தேங்க்ஸ் பத்ரி சார்...

    ஓ...பாராட்டி எதுவும் எழுதலையா? அவசரப் பட்டுட்டேனோ?!

    அது சரி....'அவர் என்ன சொல்றாருன்னா...' அப்படீன்னு நீங்க ஆரம்பிச்சதும் எனக்கு எங்க ஊரு 'சுந்தரம்' தியேட்டரிலே மெயின் பிக்சருக்கு முன்னாடி 'டொய்ங் டொய்ங் டொய்ங்..' அப்படீன்னு ஒரு சவுண்டோட அரதப் பழசான கறுப்பு வெள்ளையிலே, ஏதாவது ஒரு காஞ்சு போன வட மாநில கிராமத்தை காட்டி அதிலே வயசான ஒருத்தரை ஹிந்தியிலே பேசச் சொல்லி அவரு கொரலுக்கு மேலேயே, "இவர் தான் பந்த்ரன் சிங்.. இவர் கூறுகிறார்...ஹம் ஆப் கே ஹைன் கௌன்...குர்பானி ஷோலே சோளி கீ பீச்சே கியா ஹை!... ரொம்ப நாளா சாப்பாட்டுக்கே கஷ்டப் பட்டுகிட்டிருக்கோம்... அமெரிக்கா ஆப்ரிக்கா மேலே போர் தொடுக்கலைன்னா எங்களூக்கெல்லாம் அஞ்சு வேளைக்கு சாப்பாடு கெடச்சிருக்கும்" அப்படீன்னு எல்லாம் பேசிக்கிட்டிருக்கும் போதே அதுக்கு ஒதுக்கப்பட்ட (?!) அஞ்சு நிமிஷ டைம் முடிஞ்சு, லோக்கல் சங்கம் சில்க்ஸ் விளம்பரம் ஓட ஆரம்பிச்சிடும்... அந்த எபெக்ட் இருந்துச்சு சாரே!

    ReplyDelete
  4. இதைத்தான் சுனாமி பற்றிய என்னுடைய பதிவுகளில் சொன்னேன்.

    இது சுலபமான சங்கதி அல்ல.

    ராஜ்குமார்

    ReplyDelete
  5. தங்களின் பொதுநல நோக்கு ஒருக்காலும் பாதிப்படையக் கூடாது ராம்கி. தங்களின் மன உறுதிக்கு விடுக்கப்பட்ட சவாலாகக்கூட அந்நிகழ்வு அமைந்திருக்கலாம். சமுதாயத் தொண்டு நமது ஏழு பிறவிக்கும் பெரும் புண்ணியங்களாகக் கூடவே வரும்.

    ReplyDelete
  6. நன்றியை தெரிவிக்க போஸ்டர் அடித்து ஒட்டுமளவுக்கு மீனவர்கள் சகஜநிலைக்கு திரும்பிவிட்டார்களா என்று யாருமே கேட்கவில்லையே!

    ReplyDelete